தமிழ் கதைகள் – தற்பெருமை

ஒரு தடவை முல்லா ஒரு குளக்கரை ஒரமாக நடந்து சென்றார். வழியில் ஒரு கல் தடுக்கி குளத்தில் விழுவதற்குள் அவருக்கு பின்னால் வந்த மனிதர் பாய்ந்து வந்து முல்லாவை குளத்தில் விழாமல் காப்பாற்றினார். முல்லா அவருக்கு நன்றி சொல்லிவிட்டு போய்விட்டார். ஆனால் முல்லாவைக் காப்பாற்றியவரோ, முல்லாவை எந்த இடத்தில் யாருக்கு நடுவே சந்தித்தாலும் குளத்தில் விழ இருந்த முல்லாவை நான்தான் காப்பாற்றினேன் என்று சொல்லிக்கொண்டே இருந்தார்.

முல்லா, அவருக்கு தகுந்த நேரத்தில் சரியான பாடம் கற்பிக்க வேண்டும் என்று நினைத்தார். முல்லா, ஒரு நாள் அந்த குளக்கரைப் பக்கம் மக்கள் நடமாட்டம் அதிகமாக இருக்கும் பொழுது, அந்த தற்பெருமைக்காரர் குளக்கரையில் யாரோ ஒருவருடன் பேசிக்கொண்டிருப்பதை பார்த்தார். திடீரென முல்லா குளத்தினுள் குதித்து விட்டதைப் பார்த்த மக்கள் கூக்குரல் எழுப்பினர். முன்னர் முல்லாவைக் குளத்தில் விழாமல் காப்பாற்றியவரும் அவசர அவசரமாகக் குளத்தில் குதித்தார்.

முல்லாவுக்கு நீந்தத் தெரியும் என்பது அவருக்கு தெரியாது. எனவே முல்லாவை காப்பாற்ற குளத்தில் குதித்தார். முல்லா குளத்தில் நன்றாக நீச்சலடித்து விளையாடிக் கொண்டிருந்தார். முல்லா, தற்பெருமை பேசிய அவரை மக்கள் முன் அறிமுகப்படுத்தி, நீந்த தெரிந்த என்னை இவர்தான் ஒரு தடவை நீரில் மூழ்கி விடாமல் காப்பாற்றி பேருதவி செய்தார் என்றார்.

3